اسرائیل نے مقبوضہ مغربی کنارے میں واشنگٹن پوسٹ کے فوٹوجرنلسٹ پر حملے اور ایک یورپی سفارتی قافلے کو نشانہ بنانے کے الزام میں دس اسرائیلی آبادکاروں کو گرفتار کر لیا ہے۔ یہ گرفتاریاں اس وقت عمل میں آئیں جب امریکا اور یورپی ممالک نے اسرائیل سے آبادکاروں کے خلاف سخت کارروائی کا مطالبہ کیا۔
رپورٹس کے مطابق نقاب پوش اسرائیلی آبادکاروں نے مغربی کنارے میں واشنگٹن پوسٹ کے ایک فوٹوجرنلسٹ پر حملہ کیا اور ایک یورپی سفارتی قافلے کو بھی نشانہ بنایا۔ ان واقعات کے بعد امریکا اور یورپ کی جانب سے اسرائیل پر دباؤ بڑھا کہ وہ آبادکاروں کے خلاف فوری اور مؤثر کارروائی کرے، جس کے تناظر میں اسرائیلی پولیس نے دس آبادکاروں کو حراست میں لیا ہے۔
مغربی کنارے میں اسرائیلی آبادکاروں کے حملوں کے واقعات میں مسلسل اضافہ دیکھا جا رہا ہے، جن میں فلسطینی شہریوں کے ساتھ ساتھ صحافی اور سفارتی عملہ بھی نشانہ بن رہے ہیں۔ انسانی حقوق کی تنظیمیں اور بین الاقوامی ادارے ان حملوں پر گہری تشویش کا اظہار کر چکے ہیں۔