صدر ٹرمپ کا ‘مجلسِ امن’ اجلاس طلب: نیتن یاہو کی وائٹ ہاؤس آمد اور غزہ کی تعمیرِ نو کے لیے فنڈز جمع کرنے کا منصوبہ

ایکسیس کی رپورٹ کے مطابق امریکی صدر ڈونلڈ ٹرمپ کی جانب سے تشکیل دیے گئے ‘مجلسِ امن’ (بورڈ آف پیس) کا پہلا سربراہی اجلاس 19 فروری کو واشنٹن میں منعقد ہونے جا رہا ہے جس کا بنیادی مقصد غزہ کی تعمیرِ نو کے لیے عطیات جمع کرنا ہے۔ امریکی اور غیر ملکی حکام کے حوالے سے بتایا گیا ہے کہ یہ اہم بیٹھک یو ایس انسٹی ٹیوٹ آف پیس میں ہو گی جو کہ غزہ کی بحالی کے لیے فنڈ ریزنگ ایونٹ کے طور پر بھی کام کرے گی، تاہم اس کی منصوبہ بندی ابھی ابتدائی مراحل میں ہے جس میں تبدیلی کا امکان موجود ہے۔
اس اجلاس سے ایک روز قبل 18 فروری کو اسرائیلی وزیراعظم بنجمن نیتن یاہو وائٹ ہاؤس میں صدر ٹرمپ سے ملاقات کریں گے، جس کی تصدیق اسرائیلی حکام اور عبرانی میڈیا نے بھی کی ہے۔ جنوری کے آخر میں شروع کیا گیا یہ ‘مجلسِ امن’ منصوبہ ابتدائی طور پر غزہ میں جنگ بندی کے بعد عارضی حکمرانی کی نگرانی کے لیے بنایا گیا تھا، لیکن بعد ازاں صدر ٹرمپ نے اس کا دائرہ کار عالمی تنازعات تک پھیلا دیا، جس پر ناقدین نے تشویش ظاہر کی ہے کہ اس کا مقصد اقوامِ متحدہ کو نظر انداز کرنا اور کثیر جہتی عالمی اصولوں کو کمزور کرنا ہو سکتا ہے۔
ایک طرف جہاں مغربی ایشیا کے کئی امریکی شراکت داروں نے اس میں شرکت پر آمادگی ظاہر کی ہے، وہیں کئی مغربی اتحادی اب تک اس سے دور ہیں۔ یہ سفارتی سرگرمیاں ایک ایسے وقت میں ہو رہی ہیں جب غزہ میں جنگ بندی کے معاہدے کی تقریباً روزانہ کی بنیاد پر خلاف ورزیوں کی اطلاعات موصول ہو رہی ہیں۔ رپورٹ کے مطابق اکتوبر میں ہونے والی ‘جنگ بندی’ کے آغاز سے اب تک اسرائیلی حملوں میں 550 سے زائد فلسطینی شہید ہو چکے ہیں، جس نے خطے میں امن کی کوششوں پر سوالیہ نشانات کھڑے کر دیے ہیں۔