واشنگٹن / غزہ سٹی: وائٹ ہاؤس نے غزہ کی پٹی کے لیے ایک نئے عبوری سویلین ڈھانچے "نیشنل کمیٹی فار دی ایڈمنسٹریشن آف غزہ” (NCAG) کے قیام کا باضابطہ اعلان کر دیا ہے۔ یہ کمیٹی صدر ٹرمپ کے پیش کردہ امن منصوبے کے دوسرے مرحلے کا حصہ ہے، جس کا مقصد غزہ کی تعمیرِ نو اور انتظامی امور کو سنبھالنا ہے۔
علی شعث کی سربراہی میں 15 رکنی ٹیکنوکریٹ کمیٹی
سابق فلسطینی نائب وزیر ٹرانسپورٹ ڈاکٹر علی شعث کو اس قومی کمیٹی کا سربراہ مقرر کیا گیا ہے۔ یہ کمیٹی موجودہ حکومتی ڈھانچے کی جگہ لے گی اور اس میں فلسطینی دھڑوں کی مشاورت سے 14 دیگر ماہرین (ٹیکنوکریٹس) شامل کیے گئے ہیں۔
کمیٹی کے اہم ارکان درج ذیل ہیں:
* عاید ابو رمضان: معیشت اور صنعت (سربراہ غزہ چیمبر آف کامرس)
* سامی نعمان: امورِ داخلہ (سابق سکیورٹی آفیسر)
* عاید یاغی: صحت
* ہانا ترازی: سماجی امور (کمیٹی میں شامل پہلی مسیحی خاتون)
* بشیر الرئیس: خزانہ * اسامہ السعداوی: ہاؤسنگ (تعمیرات)
* جابر الداعور: تعلیم
* علی برہوم: بلدیات اور پانی
بین الاقوامی نگرانی اور ‘پیس کونسل’ کا قیام
امریکہ نے غزہ میں استحکام اور تعمیرِ نو کی نگرانی کے لیے اعلیٰ سطح کے بین الاقوامی بورڈز اور عہدیداروں کا بھی اعلان کیا ہے:
* بین الاقوامی استحکام فورس:
جنرل جاسبر جیفرز کو غزہ میں بین الاقوامی استحکام فورس کا کمانڈر مقرر کیا گیا ہے۔
* اعلیٰ نمائندہ (High Representative):
بلغاروی سفارت کار نکولائی ملادینوف غزہ کے لیے ہائی ریپریزنٹیٹو کے طور پر فرائض انجام دیں گے۔
* غزہ پیس کونسل:
صدر ٹرمپ کی زیرِ صدارت ایک خصوصی کونسل تشکیل دی گئی ہے جس میں جارڈ کشنر، مارکو روبیو، اسٹیو وٹکوف اور سابق برطانوی وزیراعظم ٹونی بلیئر شامل ہیں۔
علاقائی اور عالمی شراکت دار
اس نئے انتظامی ڈھانچے کو سپورٹ کرنے کے لیے ایک ایگزیکٹو اور مشاورتی باڈی بھی بنائی گئی ہے، جس میں ترکیہ کے وزیر خارجہ ہاکان فیدان، متحدہ عرب امارات کی ریم ہاشمی، قطر کے علی الثوادی، اور مصر کے حسن رشاد جیسے اہم علاقائی نام شامل ہیں۔
حتمی مقصد:
وائٹ ہاؤس کے مطابق، اس کمیٹی (NCAG) کا بنیادی کام غزہ میں عوامی خدمات کی بحالی، روزمرہ کے انتظامی امور چلانا اور بڑے پیمانے پر تعمیرِ نو کے عمل کی قیادت کرنا ہے۔ یہ ڈھانچہ ایک عبوری انتظام کے طور پر کام کرے گا تاکہ غزہ کو طویل جنگ کے اثرات سے نکال کر پائیدار امن کی طرف لے جایا جا سکے۔