فلسطینی وزارت صحت نے گزشتہ رات دیر گئے رام اللہ کے مشرقی قصبے دیر جریر میں قابض فوج کی فائرنگ سے ترپن سالہ عودہ عبدالرحیم عودہ فراخنہ اور چھبیس سالہ احمد عادل رشید ابو مخو کی شہادت کی تصدیق کی ہے۔
دیر جریر کی ویلج کونسل کے سربراہ عید حماد نے بتایا کہ قابض فوج کی سرپرستی میں آباد کاروں نے پرانے قصبے کے ایک مکان پر دھاوا بولا اور بھیڑ بکریاں قبضے میں لے کر ان پر نشانات لگائے، جس کے بعد نوجوانوں سے جھڑپیں شروع ہو گئیں اور قابض فوج و آباد کاروں نے شدید فائرنگ کی۔انہوں نے مزید بتایا کہ اس دوران ویلج کونسل کے رکن عودہ فراخنہ اور نوجوان احمد ابو مخو شہید ہو گئے، جبکہ دیگر افراد زخمی ہوئے۔ قابض فوج اور آباد کاروں نے ایمبولینسوں کی آمد میں رکاوٹیں کھڑی کیں اور تنگ راستوں کے باعث زخمیوں کا انخلا شدید متاثر ہوا۔
ان کا کہنا تھا کہ یہ گاؤں یہودی بستیوں، چوکیوں اور رکاوٹوں کے محاصرے میں ہے جہاں طبی سہولیات کا فقدان ہے۔ عام زخمیوں کو سلواد ایمرجنسی سینٹر جبکہ تشویشناک حالت والے مریضوں کو فلسطین میڈیکل کمپلیکس منتقل کیا جاتا ہے۔واضح رہے کہ آباد کاروں کے اس وحشیانہ حملے کے نتیجے میں مجموعی طور پر مزید تین فلسطینی شدید زخمی ہوئے ہیں۔فلسطینی ہلال احمر سوسائٹی کے مطابق، ان کے عملے نے ابتدائی طور پر آباد کاروں کے حملے میں پیٹ میں گولیاں لگنے سے شدید زخمی ہونے والے ایک شخص کو طبی امداد فراہم کی جسے بعد ازاں سلواد ایمبولینس کے ذریعے اسپتال منتقل کیا گیا۔بعد ازاں ہلال احمر نے مزید دو زخمیوں کو طبی امداد فراہم کرنے کی تصدیق کی، جن میں سے ایک پچپن سالہ شہری کی حالت انتہائی تشویشناک تھی اور اسپتال منتقلی کے دوران اس کی جان بچانے کے لیے ہنگامی طبی امداد اور مصنوعی تنفس فراہم کیا گیا۔مقامی ذرائع نے یہ بھی بتایا کہ قابض فوج نے ایک زخمی کو اسپتال منتقل کرنے والی ایمبولینس کو بھی سیدھی فائرنگ کا نشانہ بنایا۔
رام اللہ اور البیرہ گورنریٹ کے قصبوں اور دیہاتوں میں اسرائیلی قابض فوج کی سرپرستی میں فلسطینیوں اور ان کی املاک پر آباد کاروں کے حملوں میں تشویشناک حد تک اضافہ دیکھا جا رہا ہے، جن میں تشدد، براہ راست فائرنگ، املاک کو نذر آتش کرنا اور زرعی زمینوں کی تباہی شامل ہے۔